قضية خلع و ايصال أمانة

  1. افتراضي قضية خلع و ايصال أمانة

    بسم الله الرحمن الرحيم ...
    مش عارفة أبدأ مشكلتي منين ..أنا مكتوب كتابي بقالي دلوقتي 8 شهور و حصلت مشاكل كبيرة أوي مع خطيبي و اهله من أول تلات شهور تقريبا بعد كتب الكتاب و فضلت المشاكل مستمرة لدرجة أصبح من الصعب ان احنا نكمل مع بعض على الإطلاق ..
    المهم ان العناد زاد أوي بينه و بين أهلي لدرجة ان خطيبي أو اللي كان يعني خطيبي ربنا يسامحه قاللهم أنه مش هيطلقني و زي ما دخلنا بالمعروف نخرج بالمعروف الا بعد ما أتنازله عن نصف مؤخر الصداق برغم اني مش أنا اللي طلبت الطلاق لأ كان هو اللي عايز يطلقني وأنا فعلا كنت موافقة اني أتنازل لأني كنت بجد مش عايزة منه أي حاجة لأني كنت بدأت أقتنع و أتاكداننا فعلا مش هننفع نكمل مع بعض من سوء معاملته ليا و سوء أخلاقه معايا ومع أهلي و عيوب كتير بدأت تظهر بالتدريج في شخصيته بالرغم اني اتحايلت عليه في الأول كتير أوي انو يراجع نفسه في ٌقراره ده و اني بحبه و مش هقدر أعيش من غيره ولأني كمان ماكنتش عايزة أكون مطلقة و أنا عمري 24 سنة ...
    ولكن هو صمم على الطلاق ولكن اشترط على أهلي انهم يردولو تمن الشبكة 15 ألف جنيه مش الشبكة نفسها و كمان 20 ألف جنيه ود المبلغ اللي صرفه على تجهيز الشقة اللي كان من المفروض ان احنا هنتجوز فيها...
    وقاللهم يا أما انهم يوافقوا على شروطه دي ي اما هيسبني كده متعلقة لا هيتجوزني ولا هيطلقني ...ماكنش قدامنا وده اللي ناس كتير نصحونا بيه غير اننا نرفع عليه قضية خلع ...أنا ماكنتش قادرة أعمل كده في الأول بس هو للأسف ما سبش قدامي حل تاني ...
    المشكلة بقلى اني قريت على الانترنت حاجات بتقول ان دعوى الخلع قبل الدخول القاضي ممكن يرفضها أو تتحول لقضية طلاق وده بياخد وقت طويل في المحكمة...
    تاني مشكلة اللي هي فعلا مشكلة كبيرة اني خطيبي ربنا يسامحه خلاني أمضيله على ايصال أمانة اني أخدت منه مبلغ 30IMG ألف جنيه على سبيل الأمانة ...
    وده حصل أثناء فترة الخطوبة و قبل كتب الكتاب و قاللي ساعتها ان ده بس عشان يختبرني اذا كنت بثق فيه ولا لأ...و ان الورقة دي هتفضل بس معاه لحد يوم كتب الكتاب و بعدين هيقطعها قدامي وأنا مش عارفة ازاي قدر يضحك عليا و يقنعني وقتها بكده...
    و طبعا لما سألته عليها بعد كدة قاللي و حلفلي ان قطعها ...دلوقتي أنا بجد خايفة من الموضوع ده أوي و خايفة حتى اني أقول لاهلي حاجة زي دي ..و حاسة انها مصيبة كبيرة وان هيبتزني بيها في الوقت المناسب و خصوصا اني اكتشفت بعد كده انه هو وأهله للأسف مافيش عندهم ذرة خوف من ربنا و العياذ بالله و بجد عندهم تبرير لكل تصرف بيعملوه على انه صح ...
    أنا فعلا مش عارفة أعمل اي أرجوكم ساعدوني و ردوا عليا في أقرب وقت

  2. افتراضي الرد علي موضوع قضية خلع وايصال امانة من مجموعة العدل للاستشارا ت القانونية الراعي الرسمي للمنتدي

    السلام عليكم ورحمة الله وبركاته......

    اختي صاحبة الموضوع / بالنسبة لقضية الخلع يجوز لكي رفعها حتي اذا كان الدخول الشرعي لم يتم بعد وذلك لوجود خلافات تمنع العشرة بينك وبينه وذلك يثبت بشهادة الشهود او كافة طرق الاثبات بشرط ان تتنازلي عن نصف مؤخر الصداق تردي له مقدم الصداق المثبت في عقد الزواج - ثانيا بالنسبة لايصال الامانة السؤال الاهم لكي نجيب عليكي اجابة واضحة هو انك هل قمتي بالتوقيع علي ورقة بيضاء ثم قام هو بملء هذه الورقة ام وقعتي علي ورقة بصيغة ايصال امانة كامل وهل زوجك وقع علي قائمة المنقولات ام لا - ارجو ارسال رسالة توضح هذ الاسئلة او الاتصال بالمجموعة عن طريق الارقام الموضحة...........

    ونحن دائما في خدمة الجميع ونسال الله ان يجعلنا سببا لحل جميع الموضوعات بالمنتدي

    مجموعة العدل للاستشارات القانونية

    ا/محمد مطر المحامي

    01223694574

المواضيع المتشابهه

  1. ايصال امانة
    بواسطة حمزة سعيد احمد في المنتدى منتدى القانون
    مشاركات: 6
    آخر مشاركة: 10 - 05 - 2010, 06:11 AM
  2. ايصال امانة
    بواسطة mabdelr7man في المنتدى منتدى القانون
    مشاركات: 1
    آخر مشاركة: 11 - 02 - 2010, 07:55 AM
  3. صور كمال اجسام
    بواسطة febe في المنتدى منتدى الرياضة
    مشاركات: 16
    آخر مشاركة: 08 - 02 - 2010, 05:14 PM
  4. ايصال امانة على بياض استشارة قانونية
    بواسطة g.fahmi في المنتدى منتدى القانون
    مشاركات: 1
    آخر مشاركة: 04 - 02 - 2010, 07:08 AM