شباب الجامعة
المهم تعالوا نشوف حال وانواع شباب الجامعة _ وعينكم طبعا ما تشوفش الا النور_:
اول نوع ابن الباشا والست هانم جاى بلبانة ومصاصة ولابس البادى، وفى ايدوو كراسه بيسموه عندنا فى جامعة اسكندرية عبيط الشلة ( النوع ده ممنهوش اى خطر )
تانى نوع وهو النقيض لابن الباشا والست الهانم ماما _ طبعا مع تشيد كل حروفها_ لكنه ابن عم عبده و خالتى مراة عم عبده النوع ده تلاقيه فتوة الشلة الواد الجن اللى لا بيخاف ولا بيرن ، ههههههههه انا بجيب الكلام ده منين .. منه لله اخويا هو السبب ، طبعا النوع ده ممنهوش رجى ولا نفع الا فى الخناقات حول البنات لاثبات القدرات .. والنوع ده بيطول اوووى فى الدراسة
تالت نوع : الطبقة المتوسطة ابن المدرس ولا الموظف الغلبان والام اللى بتجرى فى كل مكان من شغل لبيت لعيال
ده منه نوعين :
الاول تلاقيه لا بيهش ولا بينش رفيع زى عود القصب المصوص شايل كشكول وكتاب .. على وشه علامات الغباء ، ومنطوى ومكسور بيفكر فى الماضى والمستقبل واعرابهم ، بينجح دائما بعد ما يحفظ الكتب وتلاقى تقديراته كلها تتراوح بين مقبول ومقبول وده من البيت للجامعة ومن الجامعة للبيت
التانى وهو بيج بوس الشلة .. واد فتك بيعرف يرسمها ،كلمته مسموعة وامره مطاع والكل بيجرى عشان ينفذ خطته .. طبعا مدوخ اهله بينزل كل يوم من بيته مدعى عليه من امه واخواته فاشل وساقط وراسب دى صفاته
النوع الرابع : هو دنجوان الشلة ممكن يكون من كل الطبقات السابقة .. تلاقيه ملزق شعره وبيبربش بعنيه .. مايعرفش فى الدنيا غير الموبايل والتليفون .. وطبعا هتلاقيه ايحه وتلقيحه معهوش ولا جنيه ولا بريزة والبنات هى اللى بتصرف عليه
النوع الخامس: طبعا ما ننساش البيه ابن الدكتور او الدكتورة ، الدكتوراه مضمونة والوظيفة محجوزة
طبعا هتلاقيه فى الطراوة
هى دى يا سادة انواع واحوال الشباب فى جامعتنا المصرية المصانة